Орындық ішіндегі материал қатерлі ісікке әкелуі мүмкін бе?

Американың химиялық қоғамы жариялаған Environmental Science & Technology журналында көлік салонындағы ауада антипирен бар екені анықталған зерттеу нәтижелері көрсетілген.

Антипирен — көбікполиуретанда болатын отқа төзімді қоспа, ол көлік орындығын жасағанда толтырғыш ретінде қолданылады.

Зерттеу нысаны болған трис (1-хлор-изопропил) фосфаты (TCIPP) қазір АҚШ-тың Ұлттық токсикология бағдарламасына сәйкес ықтимал канцероген ретінде зерттеліп жатыр. Былтыр TCIPP мен тірі организмдер арасындағы канцерогендік тәуелділік зертханадағы егеуқұйрықтар көмегімен анықталған.

Жұмыс барысында америкалық ғалымдар 2015–2022 жылдары шыққан бензин, электрлі және гибрид күштік құрылымы бар жүзден астам көліктегі ауаның құрамына талдау жасады. Жылу TCIPP мөлшеріне қаншалықты әсер ететінін анықтау үшін ел бойынша қыста да, жазда да сынақтар жүргізді.

Ауадан табылған антипиреннің көлемі өте аз, бірақ зерттелген көліктердің көбінде зиян болуы мүмкін химиялық заттар табылды. Ыстықта салондағы химиялық заттардың концентрациясы қалыпты температураға қарағанда 2-5 есе жоғарылайтыны белгілі болды.

Жоба авторлары жұмысты бірқатар шектеуші факторды ескере отырып бағалау керек дейді. Олар тек 154 машинаны тексергенін және салондағы ауа температурасы туралы нақты деректер жоқ екенін атап өткен. Соңғысының орнына жуық мәндер қолданыпты.

Зерттеу нәтижелері антипиренді қоспалармен байланысты ықтимал қауіп дәрежесін толық түсіну үшін қосымша бағалау қажет екенін көрсетеді. Әзірге көлікті көлеңкеде ұстап, ішін жиі желдетіп, кондиционерді ішкі рециркуляция жүйесін қоспай пайдаланған жөн.