Орташа жылдамдықты асырғандарға қашан айыппұл салынады

Орташа жылдамдықты тіркеуге рұқсат беретін, сондай-ақ оны есептеу тәртібін және жылдамдықты асырғаны үшін жазалау шарасын анықтайтын заңға енгізілген түзетулер биыл желтоқсанда күшіне енеді.

Kolesa.kz редакциясына Көлік комитеті хабарлағандай, қазір республикалық маңызы бар 13 ақылы жол учаскесіндегі 62 жерде арка арқылы өтетін көліктің жылдамдығы тіркеледі:

• Астана — Щучинск,
• Жібек Жолы — Теміртау,
• Астана — Павлодар,
• Шымкент — Қызылорда,
• Шымкент — Өзбекстан шекарасы,
• Шымкент — Тараз,
• Тараз — Қайнар,
• Қонаев — Талдықорган,
• Павлодар — Семей — Қалбатау,
• Орал — Ресей шекарасы (Саратов бағыты),
• Павлодар — Ресей шекарасы (Омск бағыты),
• Бейнеу — Ақжігіт,
• Орал — Ресей шекарасы (Самара бағыты).

Камералар Әкімшілік құқық бұзушылықтың бірыңғай тізіліміне қосылған, және жол қызметкерлері орташа жылдамдықты автоматты тіркейтін бағдарламалық жасақтама орнатуды бастады. Жолшылар жұмысты жыл аяғына дейін аяқтауды жоспарлап отыр.

Комитеттің айтуынша, алдағы уақытта орташа жылдамдықты бақылау үшін тағы 31 аппараттық кешен төрт басқа ақылы учаскеге орнатылады. Осылайша жолда 93 тіркеу нүктесі болады. 2015 жылы Астанада орташа жылдамдықты тіркейтін камералар сынақтан өте бастады.

Алматы полицейлері 2018 жылдың желтоқсанында қала көшелерінде көліктің орташа жылдамдығын есептеуді бастауға уәде берген еді, бірақ орташа жылдамдық ұғымы мен оны есептеу тәртібі заңнамада болмағандықтан олардың бастамасы жүзеге аспай қалды.

Былтыр Астана — Щучинск тас жолында орташа жылдамдықты тіркеу бойынша пилоттық жоба іске қосылды. Сол кезде жолшылар күн сайын рұқсат етілген 140 км/сағ жылдамдықтан асып, орташа 151 км/сағ жылдамдықпен жүретін 250-ден астам жағдайды тіркегендерін мәлімдеді. Жүргізушілердің 13 %-ы 170 км/сағ жылдамдықпен жүрсе, 7 %-ы 180 км/сағ-тан асырған.