Omoda Ресейде C5 кроссоверінің толық жетекті нұсқасын сатады

Ресейде Оmoda маркасы C5 кроссоверінің жаңа нұсқасын сата бастады. Оның қазіргі нұсқадан басты айырмашылығы — артқы осьте көп дискілі муфтасы бар толық жетекті жүйе. Бұдан бөлек компания модельге қуатты мотор мен тәуелсіз артқы аспа орнатты.

Omoda C5 AWD 1.6 литрлік турбомотормен жүреді. Оның қуаты (150 ат күші) бұған дейінгі 1.5 литрлік мотордан (147 күш) аса көп емес, бірақ тартым күші айтарлықтай өсіп, 210-нан 275 Нм моментке жетті. Жаңа мотор вариатормен емес, 7 сатылы роботпен жұмыс істейді. Көп иінтіректі артқы аспа орнатылғандықтан, клиренсі 190-нан 180 мм-ге төмендеді.

Толық жетек жүйесі қар, балшық сияқты түрлі жол жағдайына арнап алты түрлі бапталған және муфтаны күштеп бұғаттай алады. Толық жетек пен жаңа мотордың арқасында Omoda C5-тің динамикасы айтарлықтай жақсарды. Жаңа кроссовер алғашқы жүздікті 8.6 секундта еңсереді, алдыңғы жетекті түрленім бұл шекке 9.9 секундта жететін. Бірақ екі нұсқаның да ең жоғары жылдамдығы сағатына 195 шақырым.

1 / 5

• 
• 
• 
• 
• 

1 / 5

Ресейде жаңа мотор, жаңа трансмиссия және жаңа аспасы бар Omoda C5 ең қымбат комплектацияда ғана сатылады. Жаңа нұсқа марканың Ресейдегі қазіргі топтамасын толықтырады. Ең арзан толық жетекті машина 2 879 900 рубль (16.9 млн теңге) тұрады. Мұндай C5-те 18 дюймдік дөңгелек дискісі, жарықдиодты оптика, 10.25 дюймдік екі экраны бар медиажүйе, барлық орындықты жылыту және алдыңғы орындықты желдету мүмкіндігі және электронды көмекшілер жиынтығы болады.

Екінші нұсқаның бағасы 3 049 900 рубль (17.8 млн теңге), ол панорамалы шатыр, электрлі реттелетін орындық, үздік медиажүйе және кейбір дизайн нюанстарымен ерекшеленеді.

Алда Omoda-ның Ресейдегі модельдік топтамасы 113 ат күшіне ие моторы бар S5 седанымен толығады, ал C5 кроссовері Қазақстан нарығына шығуы мүмкін. Қытайлық кроссовердің Ресейде алған сертификаты бұған мүмкіндік береді.