Нью-Йоркте Hyundai Tucson-ның премьерасы өтті

Компания бесінші буындағы Tucson-ның алғашқы суреттерін тамыздың ортасында көрсеткен. Ресми жаһандық тұсаукесері 2 қазанға қараған түні Нью-Йоркте болды.

1 / 5

Мировая премьера Hyundai Tucson прошла в Нью-Йорке

1 / 5

Бұған дейін модельдің кейбір сипаттамасы туралы ақпарат шықты. Tucson-ның дизайны түбегейлі өзгеріп, өлшемі ұлғайды. Ұзындығы 4700 мм (+60 мм), ені 1905 мм-ге (+40 мм) жетті. Дөңгелек базасы — 2785 мм (+30 мм). Биіктігі 20 мм артты (1685 мм). Салоны жаңа Avante-ні (Elantra) еске салады. Стандарт нұсқаның клиренсі — 180 мм. Кейбір нарықта жолсыз жерге бейім XRT түрленімі шығады, оның клиренсі — 210 мм. Дөңгелек дискілері — 17-20 дюйм.

Марка 150 ат күшін беретін 2 литрлік атмосфералы қозғалтқышты бұрынғыдай базалық Tucson-ға орнатады. Оның қатарына 193 ат күшіне ие 1.6 литрлік бензинді турбомотор қосылады. Біріншісі 6 сатылы механика немесе диапазоны дәл сондай автоматпен жабдықталады. Екінші мотор нарыққа қарай 7 сатылы DCT роботымен немесе 8 сатылы автоматпен жұптаса жұмыс істейді. Бренд 2.5 литрлік агрегаттан бас тартқан сияқты.

1 / 5

Тек жанармаймен жүретін модификациялардың құрамында бірнеше гибрид бар. Өздігінен қуатталатын гибрид (HEV) 1.6 литрлік қозғалтқышқа негізделген. Ол 6 сатылы автомат, шағын 1.49 кВт·сағ батарея және екі электромоторлы жаңа TMED-II гибрид блогымен жабдықталған. Бірінші электрлі агрегат стартер мен генератордың қызметін атқарады, екіншісі автоматқа кіріккен. Жалпы қуаты 245 ат күшіне (380 Нм) тең.

Қосылатын гибрид (PHEV) те 6 сатылы автоматпен жұптасатын 1.6 литрлік турбомотор алады. Жалпы қуаты — 292 а.к. 17.1 кВт·сағ аккумулятормен 81 шақырым еңсереді. Кейін Tucson-ның тізбекті гибрид нұсқасы (EREV) шығады.

1 / 4

Жабдықтар тізімі нарыққа қарай өзгереді, бірақ оған алдыңғы, бүйірлік және ортаңғы қауіпсіздік жастығы, қауіпсіздік пердесі, жүргізуші ассистенттерінің жинағы, үш аймақты климат-бақылау, орындық жылытқыш, желдеткіш және массаж, екі 15 Вт сымсыз қуаттағыш, 100 Вт USB-C розеткалары, 9.9 дюймдік цифрлық аспаптар панелі және Gleo AI жасанды интеллектісі бар Pleos Connect мультимедиа жүйесінің 12.9 немесе 17 дюймдік экраны кіреді.

Компания Tucson-ның бесінші буынын Оңтүстік Кореяда жыл аяғына қарай сата бастайды. Басқа елдерге 2027 жылы барады. Жаңа өнім Қазақстанға да келеді. Көлік Алматыдағы зауытта жасалады, келер жылы желтоқсанда конвейерге тұрады. Кәсіпорын кроссовердің шанағын дәнекерлеп, бояп, ірі торапты әдіспен құрастырады.

Комментариев: 0