1 маусымға қараған түні Нұр-Сұлтанға кірер жолға орнатылған блокбекеттер алынды. Бірақ бірқатар шектеулер әлі күшінде.
«Біз вирусты жеңген жоқпыз, бірақ індеттің шарықтау шегінен өттік. Елді мекендер арасындағы блокбекеттерді алу карантин режимінің аяқталғанын білдірмейді. Пандемияға тосқауыл қойылған жоқ. Сондықтан халық көп жиналатын жерлерде санитарлық-эпидемиологиялық нормаларды сақтау керек», — деп мәлімдеді Нұр-Сұлтан полиция департаментінің өкілі Данияр Оралов.
Департаменттің баспасөз хатшысы елордаға кірер жолда тәртіп сақшылары жүргізушілер мен жолаушылардың дене қызуын өлшейтінін айтты. Бұл талап қалалық санэпидемиологтар бекіткен алгоритмде жазылған.
Одан бөлек, 1 маусымнан бастап бас шаһарда қала сыртына қатынайтын автобустар іске қосылды. Қоғамдық көлік 6:00-ден 22:00-ге дейін жұмыс істейді. Жүргізушілер мен жолаушылар бетперде тағып, қолғап киіп, антисептикалық құралдар қолдануы тиіс.
Комментариев: 0