2020 жылы автобандағы «Автоураган» камералары 8855 жылдамдық асыру (150 км/сағ-тан жоғары) дерегін тіркеді. Ал камераға түскен ең жоғары жылдамдық — 238 км/сағ. Рекорд жасаған «жетінші» BMW G11 тізгіндеген ер адам екен. Екінші орынды бесінші сериялы G30 (232 км/сағ) иесі иеленсе, үштікті сағатына 211 шақырым жылдамдықта қозғалған «мерседес» жүргізушісі түйіндеді.
QazAvtoJol ҰК АҚ-ның баспасөз қызметі хабарлағандай, қазір тас жолдағы аркаларға орнатылған камералар әкімшілік істердің біріңғай реестрімен біріктірілуде. Процесс аяқталған соң камера тіркеген деректерді полицейлер қабылдап, хаттама толтырады.
Біраз уақыт бұрын кешенді орнатуға жауапты Computer Vision Technologies ЖШС мамандары 2023 жылға дейін елдегі ақылы жолдарға 1000-нан аса камерасы бар 200 арка орнатылатынын хабарлады.
Анықтама ретінде: «Автоураган» сағатына 255 шақырымға дейінгі жылдамдықты, 58 елдің мемлекеттік нөмірін анықтап, трафикті қадағалайды, одан бөлек көлікті автоматты түрде тіркеп, деректер базасынан іздеуге қабілетті.
Комментариев: 0