Болашақта Lada Niva Legend моделінің қызық нұсқасы сатылымға шығады. Оның негізгі ерекшелігі моторында. Капот астына дәстүрлі 1.7 литрлік қозғалтқыш орнына 16 клапанды 1.8 литрлік агрегат қойылады. Ол 122 ат күшіне (170 Нм) ие, ал модельдің өз моторы 83 күш пен 125 Нм момент береді.
Көлік қуатын арттыру идеясы АВТОВАЗ-ға емес, «Супер-Авто» компаниясына тиесілі. «Лада.Онлайн» таратқан ақпаратқа сүйенсек, қазір кәсіпорында 1.8 литрлік моторы бар «Нива» өндіруге қызу дайындық жүріп жатыр, бұл түрленім Superra 1.8 деп те аталады. Жоспар бойынша жылына 300 машина шығарылады.
«Нива» капотының астында тұратын қуатты мотор жаңа май қабылдағыш, табандық, сермер және ажыратқышпен жабдықталады. Одан бөлек инженерлер шығару жүйесін жетілдірді, ал радиаторы Lada Niva Travel-ден алынған. Моторды басқаратын софт сәл өзгертілді. Мотор бөлігінде қосалқы дөңгелек қоятын орын қалмады, оны машинаның артына іледі.
Алдын ала мәлімет бойынша қуаты артқан темір тұлпар стандарт модельмен салыстырғанда, алғашқы жүздікті бес секундқа жылдам алады.
Жаңа машинаның бағасы 1.2 млн рубль (шамамен 7 млн теңге) болады деп күтілуде. Ал Lada Niva Legend Ресейде 650 мың рубль (3.8 млн теңге) тұрады.
Комментариев: 0