Lada Niva Legend-тің алғашқы данасы Германияда шығарылады. Классикалық «Ниваны» құрастырумен Магдебургте зауыты бар «Партизан Моторс» компаниясы айналысады. Қазірше АВТОВАЗ-дың 50 жылдығына орай 50 машинадан тұратын алғашқы шағын партия жарық көреді.
Неміс «Нивасының» стандартты нұсқадан біршама айырмашылығы бар. Жол талғамайтын көлік басқа бампер, дөңгелек аркасы, молдинг және табалдырықпен ерекшеленеді. Автокөлікке 215/65 R16 өлшемді BF Goodrich шиналары орнатылған, стандарт шамдары Nolden-нің жарықдиодты шамдарымен алмастырылды, әрі осы компанияның шноркелі қойылды. Қосымша ақы төлеп, «Ниваға» шығыр (лебедка) орнатуға болады.
Интерьер де жақсартылған. Эко былғарымен қапталған орындықтар қызыл түсті тігіспен әрленеді. Машинаның техникалық жағы өзгерген жоқ (шағын лифтті қоспағанда).
50 көліктің бәрінде арнайы тақтайшадан бөлек, олардың саны шектеулі екенін растайтын сертификат болады. Машинаны Хальберштадт қаласындағы Fahrzeuge Bögelsack Service & Verkauf GmbH автосалоны 19.9 мың еуроға (мөлшермен 10 млн теңге) сатады. Салыстыру үшін айтсақ, Қазақстанда стандарт Niva Legend 5.1-5.6 миллион теңге тұрады.
Комментариев: 0