«Нива» 2030 жылға дейін шығады

Әу баста ВАЗ-2121 ретінде жарық көрген «Нива» 1977 жылдан бері шығып келеді. Бес жыл бұрын зауыт басшылары 2026 жылы модель өндірісін қысқарту туралы шешім шығарған. Бірақ жоспар қайта өзгеріпті, Lada Niva Legend 2030 жылға дейін шығады.

«Русский автомобиль» телеграмм-арнасының авторы алда машинада біршама өзгеріс болатынын хабарлады. Көктемде «Ниваға» қазіргі вакуумды панель орнына іштей қапталған пластик панель орнатады. Алдыңғы жағының дыбыс изоляциясы жақсарып, дөңгелек аркасындағы локер «Веста» мен «Грантадағы» сияқты жаңа материалдан жасалады.

Ал 2023  ылдың аяғына қарай «Нива» жарықдиодты қосымша шам (күндізгі жарық шамының рөлін атқарады) және артқы шаммен жабдықталады. Алдыңғы шамы жарықдиодты емес, есесіне оның электрокорректоры болады.

Машинаға 1.6 литрлік агрегат орнатып (8 клапанды ма, әлде 16 клапанды ма белгісіз), техникалық деректерді жақсарту жоспарланып отыр. Жаңа мотор үшін трансмиссия элементтерінің күштірек аналогы қойылады. Яғни, құрылымдық жағынан шарнир, редуктор және басқалары өзгеріссіз қалады, бірақ көбірек айналу моментіне төзімді болады.

Бірақ автордың өзі көліктің жүріс бөлігі мен моторында мұнша өзгеріс болатынына сенбейді. Мүмкін трансмиссияға қатысты өзгерістердің көбін алдымен шағын «Нива Спортта» сынап көретін шығар.