Nissan жаңа GT-R шығаруға асығар емес

Nissan қазіргі R35-пен шартты түрде қоштасқанмен, оның ізбасарын жақын арада ұсынбайтын сияқты. Концерннің топ-менеджері Франсуа Байи Drive басылымына берген сұхбатында жаңа суперкар жасау үшін қажет технология жоқ екенін айтты. Бренд бұл сегментте тек электрокармен қалғысы келеді екен.

Nissan спорттық машина жасауын жалғастырады, бірақ уақыт өте бар назарын электромобильге аударады. Фирма нарыққа «толық аяқталмаған» GT-R шығаруды қаламайды, сондықтан GT-R R36 деп аталатын купе компания жаңа компоненттер өндірісін, атап айтқанда, қатты денелі батарея жасауды қолға алған соң ғана конвейерге тұрады.

Мұндай аккумулятор энергия қорын көбейтіп, көліктің тез қуат алуына және салмағының азаюына оң әсер етеді. Соңғысын Nissan суперкар үшін аса маңызды деп санайды. Өйткені қазіргі батареямен машина тым ауыр әрі қымбат болады. Компания жылдам қозғалатын батареялы көлік жасағанда Formula-E жарысына қатысып жинаған тәжірибесін пайдаға жаратады.

Nissan батарея өндірісін 2025 жылға қарай бастайды, ал онымен жабдықталған алғашқы машинасын бір жылдан кейін сынақтан өткізеді. Оларды сериялы өндіріске жіберуге тағы бір-екі жыл кетеді. Сол себепті GT-R-дің орнын басатын модель алдағы онжылдықтың аяғына қарай жарық көруі ықтимал.

Дегенмен бренд Бейжіңдегі автошоуда 1360 ат күшіне ие Hyper Force концептісін көрсетіп, болашақта R36 жолға шығатынын ымдағандай болды.