Ресей Индустрия және сауда министрлігі «Ниссан Мэнуфэкчуринг Рус» компаниясының елдегі барлық активі, соның ішінде марканың Санкт-Петербургтегі зауыты сатылатынын хабарлады. Жаңа иесі ФГУП «НАМИ» болады. Келісімшартта алдағы алты жылда барлығын қайта сатып алуға мүмкіндік беретін қосымша тармақ бар.
Министр Денис Мантуровтың айтуынша екі тарап кәсіпорынның өндіріс қуаты мен жұмыс орындарын сақтап қалуға келісті. Сондай-ақ НАМИ басқа компанияларды серіктес ретінде тартып, бірлескен кәсіпорын құрса болады.
Ал Nissan президенті және бас атқарушы директоры Макото Учида «Ниссан» зауыт жұмысын қалпына келтіре алмағанын, сондықтан бұл келісім компания қызметкерлерін қолдаудың ең тиімді жолы екенін айтты.
Ресейдегі Nissan көліктерін кепілдік бойынша жөндеу және сатудан кейінгі қызмет көрсетуге АВТОВАЗ жауапты болады. АВТОВАЗ орталық автобөлшек қоймасын өз қолына алып, қажетті бөлшектер мен материалдарды жеткізеді. Айта кетейік, қазір Renault модельдерін де АВТОВАЗ жөндейді.
Санкт-Петербургтегі Nissan зауыты 2009 жылы ашылған. Жылына 100 мың машина өндіруге қауқарлы, бірақ одан әлдеқайда аз техника шығады. Мысалы, 2021 жылы 43 мың машина жасалды. Негізгі өнімі — Qashqai мен X-Trail. Компания зауытын Ресей мен Украина арасындағы қақтығысқа байланысты 2022 жылы наурызда жауып тастаған.
Комментариев: 0