Nio ET9-дың аспасы сенімді ме?

Nio жаңа ET9 флагманының аспасы жайлы екі бейнеролик жариялады. Марка оларды сынақ кезінде түсірген, бірақ ол электрокар шассиінің — SkyRide деп аталатын арнайы аспаның артықшылығын көрсетуге арналғаны анық. Мамандар үлкен кросс-седан капотына су құйған стакан қойып сынапты.

Nio бұрыннан танымал трюкті пайдаланды: машина жүріп келе жатқанда капот үстіндегі стаканнан су шашырамайды, бұл нашар жол көлік шанағына әсер етпейтінін білдіреді.

Бірінші сынақта вибростенд үстінде тұрған ET9-дың алдыңғы дөңгелегі тік ось бойынша жылдам қозғалады. Видеодан капот пен алдыңғы әйнек түйіскен жерде тұрған екі стакандағы су мүлде төгілмегенін көруге болады.

Екінші сынақ өте күрделі болды. Мамандар Nio ET9 капотына шағын платформа орнатып, оған шампан бокалдарынан пирамида құрады. Электрокар жасанды кедергілердің бойымен жүріп өтті. ET9 бірде-бір стақанды құлатпай мәреге жетті, бірақ ондағы су сәл шайқалғаны байқалды.

Компания SkyRide шассиінің техникасына қатысты мәліметін берген жоқ. Аспа гидравликалық элементпен жабдықталып, озық электроникамен басқарылатыны белгілі. Nio жаңа шасси жолаушыға ұшқанмен бірдей жайлылық сыйлайтынын хабарлады.

Компания ET9-ды 2023 жылдың аяғында таныстырған. 5.3 метрлік кросс-фастбек заманауи технологияға толы, машина Еуропадағы премиум брендтердің флагмандарымен бәсекелес болуға ниетті. Өлшемі үлкен болғанымен, ET9-да төрт орын ғана бар. Жаңа өнім 707 ат күшіне ие электромотормен жүреді.