Nio компаниясы бұл сегментке алғаш қадам басқан жоқ. Олар Қытайда үш электрокроссовер шығарады. Брендтің келесі моделі ET7 деп аталды, бұл көліктің ұзындығы бес метрден, ені екі метрден астам. Демек мұны толық өлшемді купе тәрізді седан деуге негіз бар. Модель компанияның өндіріс ауқымын кеңейтуге арналған. Екінші буындағы электромобильдің алдыңғы бөлігіне 245 ат күшін, артына 408 ат күшін беретін қозғалтқыш орнатылған. ET7 жүзге дейін жылдамдықты 3,9 секундта алады.
Басты артықшылығы — автопилоттың жаңа генерациясы. Оның құрамына 11 камера, 12 ультрадыбысты радар, 5 мм радар, фронтал лазерлік радар, 2 GPS, онлайн-ADMS жүйесі және төрт процессорлы Nvidia Orion SoCs басқару компьютері кіреді. Осы жабдықтардың барлығы 69 мың доллардан басталатын жалпы бағасына кіреді. Автопилотты пайдалану үшін айына 105 доллар төлеу керек.
Клиенттің қалауы бойынша қайта зарядталатын батареялар ұсынылған. Олар үшеу: базалық 70 кВт.сағ, стандартты 100 кВт.сағ және жоғарғы 150 кВт.сағ., Сәйкесінше бір зарядта 500, 700 және 1000 шақырым жүруге болады. Аккумуляторы жоқ автокөлікті 58 мың долларға жалға алуға болады.
Аккумуляторды жазылу арқылы (подписка) қолдану бағасы: 70 киловатт нұсқасы — айына 150 доллар, 100 киловатт нұсқасы — 230 доллар.
Төрт адамға арналған салонның іші өте кең. Наппа былғары қаптамасы, ротан ағашы, панорамалық шатыр және 1000 ватт жоғары сапалы аудио жүйесі бар. Тік экранның өлшемі 10,2 дюйм, мультимедиялық планшет —12,8 дюйм.
Қытайда Nio ET7-ге тапсырыс қабылдау 2022 жылы көктемде басталады.
Комментариев: 0