Nevo E07 кроссовер-трансформері конвейерге тұрды

Марка сәуірдегі Бейжің автосалонында таныстарған Nevo E07-нің (Qiyuan E07) алғашқы сериялы экземпляры Юбэйдегі Changan зауытында конвейерден шықты. Changan модельді жаңа автомобиль жанрының алғашқы үлгісі деп санайды, ол — тұңғыш сериялы трансформер. Кроссовер пикапқа айналады. Қазір E07-ге алдын ала тапсырыс беруге болады, ал тікелей сауда қазанда басталады.

Ұзындығы бес метр, дөңгелек базасы үш метр болатын Nevo E07 бір қарағанда әдеттегі кросс-купеге ұқсайды. Төбенің бір бөлігі жоғары жылжиды, ал артқы жағы борт болады, осылайша Nevo E07-ні кроссоверден ашық шанағы бар пикапқа айналдыруға болады. Көлікте жүксалғыш пен салон арасын бөліп тұратын қалқа жоқ.

Трансформерде функционалды жүк бөлімі болады. Артқы орындықты бүктеген кезде оның өлшемі 2880×1550 мм-ге жетеді, ал стандарт жүк көтергіштігі — 300 кг. Кроссовер табиғат аясында демалғанды жаны сүйетін жандарға арналған. Nevo E07-нің клиренсі — 227 мм.

Жаңа өнім электромотормен ғана сатылады. Моно жетекті нұсқасы 343 ат күшіне ие агрегатпен жүреді, ал толық жетекті түрленімде 256 ат күшіне ие екінші мотор болады. Nevo E07-нің ең қуатты нұсқасы 4 секундта жүзге дейін жылдамдық алады, ал ең жоғары жылдамдығы — 210 км/сағ. Батареясының сипаттамасы мен жүріс қоры жайлы қазірше ақпарат жоқ.

Changan Nevo E07-нің салоны жақсы жабдықталған, жайлы алдыңғы кресло мен төбедегі 15.4 дюймдік экраны бар артқы жолаушыларға арналған медиажүйе болады. Соған сай жаңа өнімнің бағасы айтарлықтай жоғары болады. Кросс-пикап кем дегенде 300 мың юань (20 млн теңге) тұрады.