Шығыс Қытайдағы Чжэцзян аймағына қарасты Цзиньхуа қаласында орын алған жан түршігерлік оқиғаның бейнежазбасы жуырда желіге тарап кетті. Әдетте kolesa.kz мұндай роликтерді жарияламайды, дегенмен мына бір жазбаға назар аударған жөн.
Бейнежазба кадрларынан скутер тізгіндеген әйел адамның жеңіл көлік пен бетонараластырғыш көліктің арасында келе жатқанын байқауға болады. Осы сәтте жеңіл көліктің жүргізуші жағындағы есігі ашылып, кенеттен болған соққыдан келіншек шетке қарай ұшып кетеді де, ауыр салмақты жүк көлігінің астына бірақ түседі. Оның үстіне, зардап шегушінің басы артқы дөңгелектер астында қалады. Скутер жүргізушісінің басындағы шлем оны тікелей соққыдан құтқара алмас еді (жүк көлігінің салмағы тым ауыр), дегенмен, қуанышқа орай, ол көлік дөңгелектерінің астынан сытылып шыққан. Шлем бөлініп қалғанымен, зардап шегуші аздаған жарақаттар алғаны болмаса, дін аман. Қорғанбаған жағдайда, әйел адамның күйінің не боларын елестетудің өзі қорқынышты.
Дүниежүзілік денсаулық сақтау ұйымының есебі бойынша, жыл сайын ғаламшар жолдарында 1.25 миллионға жуық адам опат болады екен. Бұл ретте жол қозғалысының ең осал тобы дәл осы мотоцикл жүргізушілері ( жол-көлік оқиғасынан қаза тапқандардың 23%-і ) болып табылады. Қазақстанда ЖКО кезіндегі төрт жағдайдың үшеуі мотоцикл тізгініндегілердің автокөлікке соғылуымен байланысты. Бұл апаттардың салдары көбіне ауыр болып жатады. Жол апатынан мерт болған мотоцикл жүргізушілерінің жартысынан астамы жүріс кезінде қорғаныш шлемдерін кимеген.
Рөлде сақ болыңыздар және шлем киюді елеусіз қалдырмаңыздар!
Комментариев: 0