«Москвич» 6 лифтбегі конвейерге тұрды

«Москвич» зауыты 6 индексті лифтбек құрастыра бастады, бірақ неге екені белгісіз, ресми дереккөздер оны седан деп атапты. Мәскеу мэрі Сергей Собяниннің телеграм-арнасында «Москвич 6» моделін үш комплектацияда және бес түсте ұсынады деп жазылған.

1 / 5

• 
• 
• 
• 
• 

1 / 5

Машинаны мамандар дәл қалай құрастыратыны туралы мәлімет жоқ, дегенмен ірі торапты әдіс қолданатын сияқты. Лифтбек тек бензинді мотормен жабдықталады.

Базалық нұсқасы вариатормен жұмыс істейтін 136 ат күшіне ие 1.5 литрлік қозғалтқышпен жүреді. Ал одан қымбатырақ екі түріне көлемі дәл сондай, бірақ 6 сатылы роботпен жұптасқан 174 ат күшіне ие агрегат орнатады. Автомобильдің ең жоғары жылдамдығы — 170 км/сағ.

4770×1820×1492 мм өлшемді лифтбектің дөңгелек базасы 2770 мм құрайды, жүксалғышының көлемі — 540 литр. Түр-тұлғасы Қазақстанда сатылып жатқан JAC J7-мен бірдей. Негізі, «Москвич 6» өз отанында JAC Sehol A5 Plus атауымен танымал осы модельдің Ресей нарығына бейімделген нұсқасы.

Базалық көлік диодты оптика, ауа баптағыш, 10.4 дюймдік дисплейі бар медиажүйе, артқы көрініс камерасы, круиз-бақылау жүйесімен жабдықталады. Салонын былғарымен қаптап, алдыңғы орындықтарға жылытқыш орнатады. Бағасы жоғары түрінде 7 дюймдік экраны бар (базада 3.5 дюймдік экран) цифрлы аспаптар панелі, климат-бақылау, айнала шолу жүйесі, жүргізуші көмекшілерінің ауқымды жинағы болады.

Модельдің бағасы әзірше белгісіз. «Москвич 3» кроссоверінің ең арзаны 2 220 000 рубль (10.5 млн теңге) тұрады. Лифтбек одан қымбат болуы мүмкін.

«Москвич» зауыты іске қосылғалы 26 мың автомобиль шығарыпты. 2024 жылы 44 мың көлік құрастырамыз деп отыр, бірақ бастапқыда өндіріс көлемін 100 мың көлікке жеткізуді жоспарлаған еді. Одан бөлек 2025 жылға қарай жаңа төрт модель өндіруге ниетті.