Бұған дейін үшінші буындағы жаңарған Mitsubishi Pajero Sport-тың бейресми фотосуреті тараған, енді жапон бренді сапалы сурет жариялап, жаңа өнім туралы мәлімет берді.
Фотосуреттен Pajero Sport-тың сырт пішінінде үлкен өзгеріс жоқ екені байқалады. Дизайнерлер машинаның алдыңғы бөлігін аздап жаңартып, артқы бамперін өзгертті, дөңгелек дискісінің жаңа түрін қосты.
Салонда жаңа Mitsubishi Triton (L200) моделінен алған рөл көзге түседі, одан бөлек машинаның үздік түрленімінде сымсыз қуаттау жүйесі болады, сондай-ақ 8 дюймдік экраны бар медиакешен жаңарды, төбеде артқы жолаушыларға арналған 12.1 дюймдік дисплей орналасқан.
Ал күштік құрылымында біршама өзгеріс бар. Аустралиялық БАҚ Pajero Sport-та жаңа мотор болмайды деген, бірақ бұл олардың өз еліне ғана қатысты болып шықты. Таиландта автомобиль 2.4 литрлік дизельді 4N16-мен жүреді. Бұл «Тритоннан» алған твин-турбо мотордың түрленімі, бірақ бір ғана турбокомпрессоры бар. Жаңа қозғалтқыш 183 ат күші мен 430 Нм береді, ал бұрынғы 4N15-тің қуаты 180 күш пен 430 Нм болатын. Агрегат 6 сатылы автоматпен жұптасады.
Pajero Sport-тың рестайлинг нұсқасы нарықта ұзақ болмайды. 2026 жылы Mitsubishi модельдің төртінші буынын шығарады.
Комментариев: 0