Mitsubishi ЕЭО нарығына арналған Outlander моделі жаңарғанын мәлімдеді. Бірақ кроссоверде үлкен өзгеріс жоқ. Сырттай радиатор торының түсі өзгеріп, алдыңғы бампердегі тұманға қарсы шамның айналасы аздап әрленді. «Аутлендердің» төбесіндегі рейлинг қара түске боялды. Тағы бір елеулі өзгеріс ретінде жаңа дизайндағы дөңгелегін айтуға болады.
Салонда өзгеріс одан да аз. Басты жаңалық — салон қаптамасы. Модельдің үздік комплектациясында орындықтар күдерімен, ал бүйір жағы жасанды былғарымен қапталған. Жүксалғыш есігінің электр жетегі ең қымбат нұсқада ғана емес, сәл арзан машиналарда да қолжетімді.
Көліктің техникалық жағы бұрынғыдай. Капот астына 2 литрлік (146 ат күші) немесе 2.4 литрлік (167 ат күші) атмосфералық мотор орнатылған. Олар тек вариатормен жұмыс істейді. Машина нұсқасына байланысты алдыңғы немесе толық жетекті болуы мүмкін.
Анықтама ретінде: үшінші буындағы Mitsubishi Outlander 2012 жылы жарық көрді. Содан бері екі рестайлингтен өтті (соңғы рет 2018 жылы). Қазақстан нарығына арналған кроссовер брендтің Калугадағы зауытында шығарылады.
Комментариев: 0