Mini Cooper-ден жасалған монстр-трак

Grind Hard Plumbing ательесі Mini Cooper мен Jeep Wrangler-дің бірігуінен пайда болған монстр-трак жобасын аяқтады. Алғашқы модельден шанағын, екіншісінен раманы алған тюнерлер шассидің біраз бөлшегін өздері ойлап табуға мәжбүр болған.

Мамандар донорды Mini Cooper-ді осы секілді машинаға айналдырғысы келіп, кейін ойынан айнып қалған әріптесінен алған. Хэтч шанағын Jeep Wrangler рамасына орнатқанмен, дайын жол талғамайын көлікке әлі ұқсай қоймаған-ды. Бірақ Grind Hard механиктері Mini-ге 46 дюймдік дөңгелек орнату ұсынысынан бас тарта алмапты.

1 / 6

• 
• 
• 
• 
• 
• 

1 / 6

Жұмыс барысында олар жүріс бөлігін толық өзгертті. Мысалы, рөлдік механизмді гидравликалық жетегі бар күрделі схемаға ауыстырды, ол көлік жүргізуге мүмкіндік бергенмен, рөл мен ірі дөңгелекті тікелей байланыстырмайды.

Аспада арнайы жобаланып, әзірленген компоненттер, ал трансмиссияда өздері монстр-трактың құрылымдық ерекшелігіне бейімдеп жасаған кардан білігі пайда болды. Отын беру жүйесі мен Wrangler-дің 4 цилиндрлі қозғалтқышын салқындату жүйесін, тежеуіш пен өзге бөліктерін жақсартты.

Ерекше жол талғамайтын көлік ширақ қозғалып, біршама тосқауылға қарсы тұрады, бірақ тюнерлер оны әлі жетілдіру керек деп отыр. Мәселен, аспа артикуляциясын жақсартып, дөңгелек аралық дифференциал қосуы мүмкін.