«Мерседес» АҚШ-та сервистік кампания жариялайды

Mercedes-Benz Солтүстік Америкада екі сервистік кампания жариялайды. Біріншісі 2024 жылғы 466 Mercedes-Benz GLE-ге (GLE 350, GLE 450 және AMG GLE 53) қатысты. Carscoops басылымы бұл машиналардың педаль түйіні дұрыс дәнекерленбеген деп жазды. Тежеуіш және газ педалі сынып кетуі мүмкін, бұл жолда өте қауіпті болады.

Тағы бір проблема механикадан емес, бағдарламалық жасақтамадан табылды, мұндай ақау GLE 450-де ғана емес, 9 сатылы автомат қорап пен 6 цилиндрлі моторы бар 2020-2023 жылғы GLS 450-де де бар. Осы ақауға байланысты марка 105 мың машинаны сервистік орталыққа шақырады.

2022 жылы наурызда трансмиссиядан ақау табылған соң ішкі тексеріс басталған. Нәтижесінде беріліс қорабы сұйықтығының температурасы төмен кезде жетіншіден алтыншы беріліске ауыстырса мәселе туындайтыны анықталды. Мұндай жағдайда мотор сөніп қалып, қайта іске қосу қиын болуы мүмкін. Машина жүріп келе жатып тоқтап қалса, қауіпті болатыны анық.

Mercedes-Benz АҚШ-та 16 сәуірден бастап аталған көліктерді арнайы орындарға шақырады.