Mercedes-Benz жаңа платформадан бас тартты

Mercedes-Benz үлкен электрокарға арналған MB.EA Large деп аталатын жаңа платформаның болашағына сенбейді. Дереккөз оның EQE мен EQS-тің жаңа буынына арнап жасалғанын айтқан, бірақ компания оны дайындауды тоқтатып, үнемделген ақшаны болашағы бар басқа жобаға жұмсауды шешті.

Жаңа платформа 2028 жылы қолданысқа енеді деген жоспар болған. Компания одан бас тартып, 4–6 млрд еуро үнемдейді деген болжам бар. EQE мен EQS топтамасы жаңарады, олар сыйымдылығы үлкен батарея және энергия үнемдейтін қозғалтқышы бар қазіргі EVA2 платформасын сақтап қалады. Сондай-ақ ол тез қуатталатын 800 вольтты архитектураға көшеді.

Компания MB.EA платформасының тағы бір нұсқасын сериялы түрде өндіреді. Ол — MB.EA Medium. Қазіргі C-класс форматындағы электромобильдер соған негізделеді. AMG бөлімшесі қуатты батареялы модельдерге жаңа құрылым дайындап жатыр. Кейін топтамаға 1000 ат күшіне ие электромобиль қосылады.

Mercedes-Benz даму стратегиясын өзгертті. Бұған дейін компания 2030 жылға дейін толық электр жетекке көшуді жоспарлаған, бірақ нарық жағдайын ескере отырып мақсатын қайта қарауға мәжбүр болды. Mercedes-Benz онжылдықтың аяғына қарай электрокар ғана емес, гибрид сатылымы да жалпы сауданың 50 %-ына жетеді деп үміттеніп отыр.