Mercedes-Benz пен Volkswagen дәстүрлі мотордан бас тартуға дайын

Өткен аптада Еурокомиссия 2035 жылдан бастап Еуроодақ аумағында іштен жанатын қозғалтқышы бар жаңа жеңіл көлік сатуға тыйым салу туралы ұсынысқа дауыс берді. Бұл жоспар шындыққа жанаспайды деген пікірге қарамастан Mercedes-Benz пен Volkswagen аталған мерзімде толықтай электромобиль өндірісіне көшуге дайын екенін мәлімдеді.

Automotive News Volkswagen өкілінің сөзін былай деп келтіреді, электрлі көлікке көшу сөзсіз жүзеге асатын жоспар, өйткені «іштен жанатын қозғалтқышты барынша тез ауыстырудың экологиялық, технологиялық және экономикалық тұрғыдан ең тиімді жолы осы».

Ал Mercedes-Benz-тің сыртқы байланыс бөлімі концерн аталған мерзімнен де бұрын, 2030 жылға қарай электромобильге ауыса алады деп есептейді. Нарық жағдайы қолайлы жерде бұл жоспар тез орындалады. Ол үшін жергілікті билік батареялы көлікке арналған инфрақұрылымды дамытуы керек.

Неміс автоөндірушілерінен бөлек Ford, Stellantis және Jaguar толық электромобильге көшуді бұрыннан қолдайды. Бірақ жаңа заңды бекіту үшін ЕО-ға мүше 27 елдің бәрі қол қоюы керек, мұның оңай жұмыс емес екені анық.