Mercedes-Benz EQE 140 көліктің өртенуіне себеп болды

Қоршаған орта министрлігі электрлі көлік қатысқан бірнеше өртті талқылау үшін шұғыл жиналыс өткізеді. Оған өткен аптада Инчхондағы көп қабатты тұрғын үй кешенінің жерасты гаражында отқа оранған Mercedes-Benz EQE түрткі болды.

Japan Times хабарлағандай, сегіз сағатқа созылған өртпен күрескен құтқарушылар 700-ден астам адамды эвакуациялады, олардың 23-і уланып, ауруханаға түсті. 140 машина жанып, зақымданды. Алдын ала мәлімет бойынша апатқа Қытайдың Farasis Energy компаниясы шығарған аккумуляторлы батарея себеп болған.

Кеңінен талқыға түскен бұл оқиғаға байланысты елдегі көптеген тұрғын үй кондоминиумы жерасты тұраққа электромобиль қоюға тыйым салды. Reuters агенттігінің мәліметінше Оңтүстік Корея үкіметі автоөндірушілерден электрокар аккумуляторын жеткізушілер туралы ақпарат беруді талап етеді.