Mercedes-Benz сынақтан өтіп жатқан бірнеше прототиптің суретін жария етті. Машинаның моторы ауысса да, күллі әлем білетін қасиеттерін жоғалтпайды деген болжам бар. Алайда оның рас-өтірігін 2024 жылдан ерте біле алмаймыз.
Батареялы G-класс стандарт көлік сияқты қырлы шанағын, көзге көрініп тұратын есік тұтқаларын, алдыңғы қанатындағы бұрылыс сигналдарын және бесінші есіктегі қосалқы дөңгелек қаптамасын сақтайды. Бірақ аэродинамикасы әлдеқайда жақсарып, оптикасы өзгереді. Оны сырттай қосалқы дөңгелек тұратын қырлы қаптамасынан танисыз.
Біраз уақыт бұрын желіде тараған суреттерде интерьері кәдімгідей өзгергені байқалады. Мамандар аспаптарды, ортаңғы консоль мен тоннельді қайта жасайды, одан бөлек жаңа рөл мен күштік құрылымның эксклюзив режимдерін басқаратын қосымша батырмалар пайда болады.
Алдын ала мәлімет бойынша EQG атауымен танымал электрлі G-class әр дөңгелегінде бір-бірден тұратын төрт мотормен жүреді. Мұндай шешім дифференциал бұғаттап, трансмиссияның төмен берілісін қосуға және танк секілді кері бұрылуға мүмкіндік береді.
Mercedes-Benz EQG-ді 2024 жылы шығарып, клиенттерге 2025 жылы жеткізе бастайды. Кейін қуаты артқан дәстүрлі нұсқасы жарық көреді. Одан бөлек бренд Little G деген атаумен жол талғамайтын көліктің шағын түрін өндіруді жоспарлап отыр.
Комментариев: 0