2020 жылы жазда Mercedes-Benz CLS қарапайым жаңартудан өтті. Машинаға MBUX мультимедиа жүйесі, өзгертілген круиз-бақылау және қосымша электроника қойылған. Бір жылға жетпей CLS тағы жаңарып отыр. Бұл жолы модель рестайлингтен өтті, бірақ өзгеріс аса үлкен емес.
Төрт есікті купе басқа бампер және жаңа радиатор торымен ерекшеленеді. Артқы диффузоры мен дөңгелектері жаңарып, түс гаммасы көгілдір металлик реңкімен толықты.
Интерьерде үлкен өзгеріс бар дей алмаймыз. Тек әрлеу материалдары басқаша CLS-ке тапсырыс беруге мүмкіндік бар. Одан бөлек жаңа рөлді байқауға болады. Қарапайым нұсқаларға үш шабақты, ал AMG-пакеттегі көліктерге шабағы қосарлы рөл орнатылады.
Инженерлер CLS 300 d дизелін жетілдірді. Турбомотордың қуаты көлемнің аздап өсуіне және қысымның жоғарылауына байланысты 245 ат күшінен 265-ке өсті. Модельдің бұл түрленімі толық жетекті болды.
Жаңарған Mercedes-Benz CLS 2021 жылы жазда сатылымға шығады. Бұл көлік Қазақстанға негізінен тапсырыс арқылы әкелінеді. Рестайлингтен өткенге дейінгі CLS-тің бағасы 37,5 млн теңгеден басталады.
Комментариев: 0