Mercedes арнайы эйрбэг жасайды

Mercedes-Benz бренді жолда жатып баратын жолаушылардың мәселесін көтерді. Автономды көлікке ауысқандықтан, компанияға салондағы қауіпсіздік концепциясын қайта қарастыруға тура келеді. Қазіргі жүйе тек отыратын жолаушыларға арналған, ал жаңасын орнатқанда жатуға мүмкіндік болады.

Компанияның жолаушылар қауіпсіздігі жөніндегі директоры Пол Дик Top Gear басылымына жақында көлік индустриясы дәстүрлі қауіпсіздік жастығын өзгертеді деді. Бұл көліктегі адамның дене қалпының түбегейлі өзгеруіне байланысты екен. Қазір жүргізуші тек отырады, келешекте электроника басқаратын құрылым арқасында шалқайып, көз шырымын алатын жағдайға жетеді. Бұндай кезде алдыңғы қауіпсіздік жастығы керек болмайды. Эйрбэг те өз функциясынан қағылады.

Пол Дик қауіпсіздік жастығын автономды басқаруға бейімдеуді жаңа міндет деп айтты. Компания мұны шешу жолдарын қарастырып жатыр, дегенмен арнайы жоспар жоқ. Мамандар жастықтарды креслоға, шанақтың ортаңғы тіреуішіне немесе қауіпсіздік белдігіне кіріктіруі мүмкін.

Белдікті де қайта жасау керек. Mercedes-Benz автомобильдерінде қауіп төнгенін болжайтын Pre-Safe жүйесі бар. Электроника апаттың алдын алу мүмкін еместігін түсінгенде, белдікті тартып, салонды дайындайды. Тартылған белдік жартылай жатқан адамды қорғаудың орнына оған зиян келтіруі ықтимал.

Кей елде Mercedes-Benz көліктері жүргізуші жолда алаңдап, рөлді ұстамағанда іске қосылатын, автономдықтың үшінші деңгейіне ие жүргізуші ассистентімен жабдықталған. Мамандардың сөзіне сенсек, автомобильдегі өзін-өзі басқару жүйесінің төртінші деңгейі жақында қолданысқа енеді.