Видеодан ауыл көшесінде оқушыларды таситын Yutong ZK6745DX балшыққа батқанын көруге болады. Автордың сөзіне сенсек, бұл жағдай Алматы облысы Панфилов ауданында болған.
«Жолды жөндей ме, әлде автобустарды алып тастай ма??? Балалар мына жерде қалай жүреді?» — деп қолданушы өзінің таңқалысын жасырмады.
Роликтің астына адамдар өз ойларын ашық жазудан еш қысылмапты. Бірақ аудандық және облыстық әкімдік бұл жағдайға қатысты ешқандай мәлімдеме жасаған жоқ.
Облыс билігі биыл шілдеде оқушыларға арнап 36 жаңа Yutong автобусын сатып алды. Талғар, Іле, Еңбекшіқазақ, Қарасай және Жамбыл аудандарына жіберген автобустарға 2 миллиардтан аса қаржы жұмсалған. Бірақ ақ жағалылар көпшілік ауданда балаларды автобуспен емес, жол талғамайтын көлікпен тасымалдау керек екенін ұмытқан сияқты. Орталық көшелердің жағдайы жақсырақ, ал шет жақтағы жолдардың сапасы сын көтермейді.
Қазір Қазақстанның ірі қалаларында көп кездесетін Yutong ZK6745DX — Қарағанды облысындағы QazTehna зауытында шығатын мектеп автобусы. Америкалық стильде жасалған машина 3.76 литрлік дизельді қозғалтқышпен жүреді. Ол 20 жолаушы, жүргізуші және тағы бір адамға шақталған. Опциялар тізімінде әр креслодағы қауіпсіздік белдігі, ABS тежеу жүйесі, жылдамдықты 60 км/сағ-қа дейін шектеу жүйесі бар, балаларды бақылау үшін бір ғана есік орнатқан.
Дәл осындай жағдайда қолданса, қытайлық техника қанша мерзімге жарайды? Қалай ойлайсыз?
Комментариев: 0