Қытайда жасалған SAIC Maxus EV90 электрлі автобустарына 13 жолаушы сыяды. Electro taxi компаниясы батапқыда Volkswagen e-Crafter-ді таңдамақ болған, бірақ оның жүріс қоры (173 км) аз екен, оның үстіне бұл көлік жүк тасымалдайтын тіркемесімен шығарылады. Фургонды жолаушыларға ыңғайлап өзгерту қосымша қаржыны қажет ететіндіктен, өзі қымбат вэн құны тым шарықтап кетеді.
Модельге балама болатын Opel Zafira-e Life көлігінен де бас тартуға тура келді. Өйткені онда орын саны (9) жеткіліксіз және оған тапсырыс бергендер Еуропада кезекте тұр. Сөйтіп, мамандар анағұрлым қолжетімді қытайлық машинаны таңдады.
Maxus EV90 шағын автобустары: техникалық жағы қандай?
Көліктің төменгі бөлігіне орнатылған сыйымдылығы 88.5 кВт*сағ батарея оған тұрақтылық береді, ойлы-қырлы жерде мұның маңызы зор. Жүріс қоры 280 шақырымды еңсеруге жетеді. Бірақ Шымбұлаққа жеткізген жүргізуші жоғары көтерілгенде пеш қосулы болса, 120-150 км жүретінін айтты. Жұмсалған энергияның жартысы рекуперация арқылы кері қайтады.
Алдыңғы жетекті шағын автобус тауға жақсы шығады. Қыс таяп қалғандықтан, бұдырлы дөңгелек орнатыпты, қар жауғанда қосымша шынжыр алу жоспарда бар.
Maxus EV90-ның төбесі биік. Орындықтары жайлы, бәрінде қауіпсіздік белдігі бар.
Maxus — жеңіл және коммерциялық көлік шығаратын англиялық марка. Оны қытайлар сатып алған. SAIC Maxus Automotive Co. Ltd. компаниясы SAIC Motor-дың еншілесі. Бірақ Қазақстанда марка өкілдігі жоқ және екі автобус әзірше тәжірибе ретінде жеткізіліп жатыр.
Сонымен қатар «Медеу» мен «Шымбұлаққа» JAC iEV7, Nissan Leaf маркалы электротаксимен және дизельді «Газелькамен» баруға болады.
Жолақысы — бір бағытқа 500 теңге. Жеңілдікке ие тұрғындар 250 теңге төлейді. Ал 7 жасқа толмаған балалар мен мүгедектер қызметті тегін пайдаланады. Электробус жұмыс күндері 9:00-ден 20:00-ге дейін, демалыста 8:00-ден 20:00-ге дейін жұмыс істейді. Терминал әзірше ақы қабылдамайды, сондықтан Kaspi арқылы төлем жасаған дұрыс.
Комментариев: 0