«Антисон» деп аталатын ұйқыға қарсы құрылғы инфрақызыл жарығы мен динамигі бар бейнекамерадан тұрады. Ол жүргізушінің рөлде отырып ұйықтап кетуінен не қырағылығын жоғалтып алуынан қорғайды. Егер жүргізуші жолға бес секунд қарамаса не екі секундтан артық көзін жұмса, ескерту сигналы қосылады. Құрылғы 2018 жылы тестілік режимде жұмыс істеді, ал келесі жылы «Мосгортранс» жүйені сатып алып, 8.4 мың қоғамдық көлікке орнату (1.74 млрд рубль) жөнінде келісімшарт жасады.
Аталған жүйенің тұрақты қолданылуы оның адам денсаулығына залал келтіретінін көрсетті. Себебі жүргізушілер инфрақызыл жарықтың көзді ауыртып, көру қабілетін төмендететінін айтқан. Қызметкерлердің тапсырысы бойынша зерттеу жүргізген «Бюро научных экспертиз» АКЕҰ жүйенің инфрақызыл сәуле шығару қарқындылығы нормативтен 300 есе артық екендігін анықтаған. Алайда бұл құрылғыдан жүргізушілердің құтылуы екіталай, өйткені жұмыс беруші қарсылық танытқандарды қызметтен қуамыз деп қорқытады екен.
Алты жылдан аса троллейбус жүргізген Алевтина Кондратьева «Антисонмен» төрт күн жұмыс істегеннен кейін басы айналып, жүрегі айнығанын және көзі ауырғанын байқапты. Оның айтуынша, ол сөйлескен жүргізушілердің жартысы дәл солай шағымданған. Кондратьева ақпан айында жұмыстан кетуге мәжбүр болды.
«Мосгортранс» жүйенің қауіптілігін жоққа шығарды. «Өндіруші технологияның қауіпсіздігін растайтын барлық құжаттарды ұсынды. Оның сәуле шығару деңгейі смартфоннан төмен», — деп хабарлады баспасөз қызметі. Ал қызметкерлердің жұмыстан шығуын компания басшылығы денсаулық жағдайымен емес, олардың жолда мұқият болмауымен түсіндірді.
Комментариев: 0