Маусым айы елдегі жаңа көлік нарығы үшін жемісті болды. Автосалондар 11 418 жеңіл машина мен жеңіл коммерциялық техника сатты. ҚАБА мәліметі бойынша бұл былтырғы маусыммен салыстырғанда 2.9 %-ға артық, сондай-ақ 2022 жылдың алғашқы жартысындағы ең жақсы көрсеткіш болды.
Биыл алты айда жүк көлігі мен автобусты қоса есептегенде 51 847 техника өтті, бұл 2021 жылмен салыстырғанда 9.2 %-ға көп. Айта кетерлігі, алғашқы бес айдың қорытындысы бойынша 2022 жылғы автонарық былтырғыдан 10 % төмен тұрған.
Алғашқы жартыжылдықта Hyundai үздік шықты. Қаңтар мен маусым аралығында марка дилерлері 13 мыңға жуық машина өткізді. Бірақ негізгі бестселлері Accent седаны қолжетімсіз болғандықтан марка көш басында ұзақ тұрмайтыны анық. 12.6 мың машина сатқан Chevrolet тізімде екінші орында тұр. Қыс айларында «Шеви» көліктері өте аз өтті, әйтпесе қазір Hyundai бірінші орында тұрмас еді.
Бұлардан кейін үздіктер тізімінде тұрған Kia, Lada және Toyota сатылымы сәйкесінше 5.6 мың, 5 мың және 4.5 мың болды.
Ресейден автокөлік келмей жатқандықтан маусымда саудаланған машиналардың
83.5 %-ы өзімізде құрастырылған техника.
2022 жылғы маусым қорытындысы бойынша нарықтағы үздік 5 марка
| Орын | Марка | 2022 жылғы маусымдағы сатылым (дана) |
| 1 | Chevrolet | 4104 |
| 2 | Hyundai | 2529 |
| 3 | Kia | 1316 |
| 4 | Lada | 1112 |
| 5 | Toyota | 756 |
Маусымда Қостанайда құрастырылған Chevrolet көліктері ең көп сатылды. Марка 4104 дана машина саудалады. Екінші орында Алматыда жиналған Hyundai (2529 дана) тұрса, үздік үштікті Kia (1316) түйіндеді.
Танымал модельдер тізімінде Chevrolet Cobalt көш бастады, седанның 2535 данасы өткен. «Кобальттан» кейін тағы бір «шеви» моделі Nexia (1157 дана) жайғасқан. Үшінші орында Hyundai Tucson (727) тұр. Бұлардан бөлек үздік бестікке Kia Sportage (566) бен Hyundai Elantra (530) енді.
Маусым айындағы басты тосын сый Kia Soul болды, кроссовердің 342 данасы өтіп, ең көп сатылған модельдер тізімінде сегізінші сатыға тұрақтады.
Комментариев: 0