Maserati-ге неге сұраныс аз

Maserati топтамасы бұрынғыдан қарағанда кеңейіп, әртүрлі шанақ пен күштік құрылымды қамтығанымен, спорттық брендтің сауда нәтижесі алаңдатады. 2024 жылдың алғашқы алты айында көрсеткіш 15 300 көліктен 6 500-ге түсті деп хабарлады Motor1.com.

Stellantis концернінің бас директоры бұған көлік сапасы немесе баға стратегиясы емес, өнімді нарықта тиімсіз жарнамалау себеп болды деді.

— Maserati-де дұрыс автомобиль де, технология да бар. Біз сұйық отын тұтынатын және толық электрлі спорттық машина ұсына аламыз. Сауданың болмауы маркетингпен байланысты, — деді Карлос Таварес.

Брендтің электр күшіне көшу процесі жоспар бойынша жүріп жатыр. Жыл басында шыққан электрлі GranCabrio Folgore кабриолетінің артынан 1200 ат күші бар батареялы MC20 Folgore суперкары шығады. Толық өлшемді электрлі SUV 2027 жылы жарық көреді, қоршаған ортаға зияны аз жаңа буындағы Quattroporte седанының тұсаукесері 2028 жылға жоспарланған.

Қазақстанда Maserati-дің ресми шоурумы жазда ашылды. Ең арзан Grecale GT кроссоверін 43 млн теңгеге алуға болады, ал MC20 Cielo суперкары 216 млн теңге тұрады.