25 мамырда таңғы 5:00 шамасында Павлодар облыстық мәслихатының депутаты, әрі Nur Otan партиясының мүшесі Қайрат Әбішевке тиесілі Toyota Camry-ді полицейлер техникалық тексерістен өтпегені үшін тоқтатады. Рөлде отырған ер адам өзгенің атын атайды, ал үстінен ішімдіктің иісі мүңкіп тұрған. Тәртіп сақшылары оны дереу наркологиялық диспансерге жеткізеді. Бірақ өзін жайсыз сезініп тұрғанын айтқан азамат сараптамадан өтуден бас тартады.
Полицейлер тұрғынның атына хаттама толтырып, істі сотқа жолдаған. Сотта Қ.Әбішев өз кінәсін мойындамай, дәрі ішкендіктен қатты иіс шыққанын айтып ақталды. Депутаттың қорғаушысы ереже бұзу дерегі болмағандықтан істі тоқтатуды талап етті. Өйткені оның қорғауындағы азамат денсаулық жағдайына байланысты сараптамадан өте алмапты-мыс.
Іс материалымен толық танысқан сот куәгерлерді, тергеудегі аудиофайлдарды тыңдап, депутатты Әкімшілік кодекстің 613-бабы, 4-бөлігі бойынша кінәлі деп тапты. Қ. Әбішев 15 тәулікке түрмеге қамалып, 8 жылға көлік жүргізу құқығынан айырылды.
Комментариев: 0