Бұл туралы ішкі істер министрінің бірінші орынбасары Марат Қожаевпен бірге Нұр-Сұлтандағы мамандандырылған ХҚКО-на барған цифрлық даму, инновациялар және аэроғарыш өнеркәсібі министрі Асқар Жұмағалиев хабарлады.
Естеріңізге сала кетейік, 2019 жылдың 1 шілдесінде Қазақстан полицейлерінің емтихан қабылдау, жүргізуші куәлігін беру және көлікті тіркеу бойынша қызметтері «Азаматтарға арналған үкімет» мемлекеттік корпорациясына өткен болатын. Бірақ жұмыс басталған алғашқы күні-ақ мамандандырылған ХҚКО-ның жұмысы тоқтап қалды. Мемлекеттік мекеме басшылығының айтуынша, мәселе мамандандырылған ХҚКО-н өңірлік полиция департаменттерінің процессингтік орталықтарымен байланыстыратын ҚР ІІМ-нің жаңа ақпараттық жүйесінің жұмысымен байланысты туындаған.
«Соңғы тәулікте ІІМ қызметкерлері қызмет көрсетуге жіберілген сұранымдарды өңдеу жылдамдығын арттыру үшін жүйеге бірқатар өзгерістер енгізді. «Азаматтарға арналған үкімет» мамандары да бұл үшін қажетті көмектің барлығын көрсетуде. Қазіргі таңда қызмет көрсету жылдамдығы артты», — деп мемелекеттік корпорация басқармасының төрайымы Әсемгүл Балташева министрге есеп берді.
ІІМ басшысының бірінші орынбасары Марат Қожаев бір түн ішінде жүйенің алты рет жаңартылғанын, ақаулардың бүгінгі күннің аяғына дейін жойылатынын айтты, ал Асқар Жұмағалиев өз қарамағындағы бөлімшелерге аталған мәселені бақылауда ұстауға және мекеменің жұмысын соңғы клиентке қызмет көрсетілгенше аяқтамауға тапсырма берді.
Комментариев: 0