Lynk & Co топтамасына 02 кроссовері қосылды

Geely құрамына кіретін Lynk & Co маркасы 02 индексті электрлі кроссоверін ресми таныстырды. Бұл атау автомобильдің Еуропа нарығына арналған нұсқасына берілген. Қытайда ол Z20 деп аталады.

02 моделі Zeekr X, Volvo EX30 және Smart #1 сияқты SEA архитектурасына негізделген. Жаңа өнім «икстен» біршама үлкен болады. Өлшемі — 4460 × 1845 × 1573 мм, дөңгелек базасы — 2755 мм.

1 / 6

• 
• 
• 
• 
• 
• 

1 / 6

Lynk & Co 02 дизайнын жасауға Гетеборг студиясының мамандары мен 01 гибрид кроссоверінің иелері атсалысты, жүргізушілер арнайы қосымша арқылы машина дизайнына қатысты ұсыныс айтты. 6 мыңнан аса ұсыныс түсті деген ақпарат бар.

Еуропада Lynk & Co 02 бір ғана күштік құрылыммен сатылады, артқы осьтегі электромотор 272 ат күші мен 343 Нм момент береді. Ол Zeekr X-тегі сияқты 66 кВт·сағ никель-марганец-кобальт батареямен жұмыс істейді, жүріс қоры 438 шақырым болады. Машина Қытайда қуаттырақ мотор және литий-темір-фосфатты батареямен жүреді.

1 / 3

• 
• 
• 

1 / 3

02-нің интерьері дәстүрлі түрде минималистік стильде жасалған, 10.2 дюймдік цифрлы аспаптар панелі мен автомобильдің барлық функциясына жауап беретін 15.4 дюймдік үлкен мультимедиа кешенінің экраны бар. Стандарт жабдықтар тізімінде сымсыз қуаттау жүйесі сияқты заманауи қосымшалар бар. Сондай-ақ салондағы артқы көрініс айнасына орнатылған камера арқылы селфи жасауға болады.

Еуропада 02-нің бағасы 35.5 мың еуродан (18.8 млн теңге) басталады. Ал Қытайға арналған Z20 индексті нұсқасы бұдан әлдеқайда арзан болады.