Li Auto көліктері Қазақстанда қанша тұрады

Тамыздың аяғында танымал Li Auto өнімдері Қазақстанда ресми түрде сатылатыны мәлім болды. Алғашқы автосалон қарашада ашылады, бірақ үш гибридтің бағасы қазірдің өзінде белгілі.

Li L6-ның ең арзан Pro нұсқасы генератор қызметін атқаратын 1.5 литрлік мотор, 36.8 киловаттық батарея және 408 ат күшін (529 Нм) беретін екі электрлі қозғалтқышпен жүреді. Бағасы — 19 978 000 теңге.

Автомобиль алдыңғы және бүйірлік эйрбэг, қауіпсіздік пердесі, бейнетіркеуіш, жүргізуші ассистенттерінің жинағы, алдыңғы панельдегі екі 15.7 дюймдік экран, 19 динамиктен тұратын аудиожүйе, алдыңғы әйнекке түсетін проекция, екі сымсыз қуаттағыш, панорамалы шатыр, үш аймақты климат-бақылау, жылытқыш, желдеткіш, массаж функциясына ие орындықтар, рөл жылытқыш, электр көмегімен реттелетін орындықпен жабдықталады.

L6-ның қымбат комплектациясы Max деп аталады. Бағасы — 22.2 млн теңге. Жолдағы жағдайды лидар мен өзге камералардан алған деректер арқылы талдайтын жүргізуші көмекшілерінің жақсарған жинағы мен белсенді қауіпсіздік жүйесін алады. Аудиожүйесі басқа, шынтақ тіреуіште тоңазытқыш тұр.

Ұзындығы 5050 мм-ге жететін үлкенірек Li L7-нің дөңгелек базасы — 3 метр. Оның Pro, Max және Ultra түрленімдері бар. Күштік құрылымы 448 ат күшін (620 Нм) береді. L6 моделіндегідей жұмыс істейді. Дөңгелекті екі электромотор айналдырады. 1.5 литрлік іштен жанатын қозғалтқыш пен 42.8 кВт·сағ батарея оған қуат береді. WLTC циклі бойынша жүріс қоры — 1100 км.

L7 Pro 23 090 000 теңге тұрса, Ultra-ның бағасы 27 856 000 теңгені құрайды. Кроссовердің негізгі комплектациясы L6-мен бірдей. Ол көмекші электроника жинағы, алдыңғы панельдегі екі үлкен дисплей, рөлдегі шағын экран (проекциямен бірге дәстүрлі аспаптар панелін алмастырады) барлық орындықтағы жылытқыш пен желдеткіш, бірінші және екінші қатарда массаж, артқы оң жақтағы жолаушыға арналған кресло, үш аймақты климат-бақылау, рөл жылытқыш, панорамалы шатыр, жүксалғыш қақпағының электр жетегі, екі сымсыз қуаттағышпен жабдықталады.

Max пен Ultra пневмоаспамен ерекшеленеді, ал базалық L7-де бейімді амортизаторлар орнатылған. Үздік Ultra артқы жолаушылардың төбесіндегі қосымша 15.7 дюймдік экран, 21 динамиктен тұратын аудиожүйе және лидар, басқа микрочип, қосымша камералар мен сезгектері бар жақсарған ассистенттер кешеніне ие.

Қазақстандағы Li Auto-ның флагманы — үш қатарлы L9. Бренд оның Pro және Ultra нұсқаларын ұсынады. Ұзындығы — 5.2 м, дөңгелек базасы — 3.1 м. L9 448 ат күшіне ие гибрид күштік құрылым алады, батарея сыйымдылығы — 52.3 кВт·сағ.

L9-дың бағасы әзірге белгісіз, бірақ құны 31 413 000–33 513 000 теңге аралығында болады.