Осыдан бірнеше ай бұрын Land Cruiser 300 таныстырылған еді, енді Lexus-тің жаңа буынына кезек келді. Lexus LX 600 13 қазан күні Нұр-Сұлтан уақытымен сағат 22:30-да жұрт назарына ұсынылады.
Lexus өкілдері премьера өтетін күнді ғана емес, жаңа LX-тің алғашқы тизерін де жариялады. Қысқа видеодан жол талғамайтын көліктің бірнеше бөлігін көруге болады. Бұдан бөлек машинаның артқы жағының суреті жарияланды, онда шанақтың екі шетіне дейін созылған жіңішке жарықдиодты жолақ назар аудартады.
Көліктің техникалық жағы туралы ақпарат аз. LX 600-дің капот астына «крузактағы» секілді 3.5 литрлік турбоүрлемді V6 қойылады. LC 300-де мұндай мотор 415 ат күші мен 650 Нм момент береді, бірақ Lexus LX-те қуатын сәл арттыруға болады. Агрегат 10 сатылы автоматпен жұмыс істейді.
LX аса сәнді салонымен ғана емес, Land Cruiser 300-де жоқ көптеген технологиямен мақтана алады. Мысалы, машинада гидропневматикалы аспа болады.
Комментариев: 0