Lexus-тың ең шағын кроссовері Жапония нарығына шығады

Бренд өз отанында LBX моделіне алдын ала тапсырыс қабылдай бастады. Кроссовердің бір-бірінен моторымен ғана ерекшеленетін үш комплектациясы болады. Бағасы — 4.6-5.8 млн иен (14.2-17.8 млн теңге).

1 / 9

• 
• 
• 
• 
• 
• 
• 
• 
• 

1 / 9

Lexus шағын көлікті биыл маусымда көрсеткен. 4.2 метрлік кроссовер TNGA-B платформасына негізделеді және Toyota Yaris Cross-пен бір шассиді бөліседі.

Салонында 9.8 дюймдік планшеті бар ірі ортаңғы тоннель мен 12.3 дюймдік аспаптар панелі тұр, одан бөлек Mark Levinson-ның 13 динамикті акустикасы мен электромеханикалық есік құлпы назар аудартады. Есігі іштен батырма арқылы ашылады. Дөңгелек дискілерінің өлшемі — 17 және 18 дюйм.

1 / 10

• 
• 
• 
• 
• 
• 
• 
• 
• 
• 

1 / 10

Lexus LBX-тің алдыңғы жетекті базалық түрлері 91 ат күшіне ие (120 Нм) 1.5 литрлік қозғалтқышпен және 94 ат күшін беретін (185 Нм) электромотормен жабдықталады. Толық жетекті нұсқаға тағы бір электромотор орнатады. Оның міндеті — жүре бастағанда көмек беру. Себебі шағын мотордың қуаты 6 ат күшінен (52 Нм) аспайды.

Жапонияда модельдің екі стандарт комплектациясы болады, ал Bespoke Build деп аталатын үшіншісі олардан әлдеқайда қымбат, дәл соның 100 данасы ғана шығады. Негізгі ерекшелігі — дербестеу құралдарының көптігі. Компания машинаны таныстырғанда LBX интерьерін әрлеудің 330 мың нұсқасын ұсынуға дайынбыз деп мәлімдеген. Демек бір партияда бірдей екі кроссовер болмауы мүмкін.

Lexus LBX моделін Еуропа нарығына арналған жаңа өнім ретінде таныстырған, бірақ ол Қарт құрлыққа келер жылдың басында жетеді.