Lexus бірнеше тизері шығып, тыңшылық суреттері тараған IS-ті ресми таныстырды. Компания үлгінің толыққанды жаңа буынын көрсетеді деп күтілген еді, алайда бұл 2013 жылдан бері өндіріліп келе жатқан седанның рестайлингі болып шықты.
Көлік жаңа бамперге, шамдарға, көптеген шанақ панельдері мен 18-19 дюймдік дөңгелектерге ие болды. Машина алдыңғы буындағы LS-ке ұқсайды, бірақ одан сәл ірі.
Қазіргі IS-тен айырмашылығы да шамалы. Мұнда таныс рөл, аспаптар панелі мен климаттық жүйені басқаратын құрылғылар көзге түседі. Ауа өткізгіштің дефлекторлары мен ортаңғы консоль өзгеріпті, көліктегі мультимедиалық кешен Apple CarPlay, Android Auto және Amazon Alexa жүйелерімен жұмыс істейді. Үздік үлгілері 10.3 дюймдік экранмен жабдықталса, қарапайым нұсқаларға 8 дюймдік дисплей орнатылады.
Бұл жаңа буын емес рестайлинг болғандықтан, техникалық жағынан үлкен өзгеріс күтудің қажеті жоқ. Автокөлік бұрынғы платформада жасалып, моторлар топтамасын да сақтап қалды. Темір тұлпар 2 литрлік турбомотормен және 3.5 литрлік V6 қозғалтқышымен ұсынылады. Қос агрегат та 8 сатылы автоматпен жұптаса жұмыс істейді. Ал аспа компоненттері сәл жеңілдеген. Бұл оған спорттық машинаға тән қасиет береді.
Автокөліктің сатылымға қашан шығатыны белгісіз. IS-ті автосалоннан жыл соңына қарай табуға болады деген болжам бар. Бірақ Қазақстан нарығына келмесі анық, себебі IS біздің елде сатылмайды.
Комментариев: 0