Lanzante ұсынған Porsche 911

McLaren-мен қоян қолтық жұмыс істейтін Lanzante ательесі су жаңа жобасын таныстырды. 930 сериялы Porsche 911 қырық жыл бұрын Формула-1 жарысында бой көрсеткен болидтің қозғалтқышын алады. Компания көлікке қатысты аз-кем ақпарат беріп, бірнеше суретін жариялады. Жоба 1985 жылы топ жарған шабандоз Ален Простқа арналады.

McLaren 1990 жылы қолданған бір жарым литрлік алты цилиндрлі мотордың қуаты 1000 ат күшіне жетеді. Бірақ шеберлер оны жалпы жол мен стандарт жанармайға бейімдейді. Рестомод авторларына Cosworth мотористері көмектесіп жатыр. Олар қозғалтқышты жаңа поршеньдер тобымен жабдықтап, басқа білік, басқару блогын және титан компрессоры бар үрлем жүйесін орнатады.

Мұндай мотордың базалық нұсқасында 500 аттың күші болады. Бірақ TAG Championship топтамасы үшін инженерлер агрегаттың қуатын 634-ке дейін арттырмақ. Ол Porsche-нің 6 сатылы механикасымен жұмыс істейді. Рестомодтың максимал жылдамдығы — 320 км/сағ.

Машинаның қарқыны керемет болуына 920 келіден аспайтын салмағы оң ықпал етті. Шеберлер шанақ панельдерін карбонға ауыстырған. Одан бөлек суперкардың интерьерін түгел дерлік өзгертіп, жеңіл дөңгелек орнатты.

Топтамадағы алғашқы көлік Championship’85 деп аталады, ол McLaren ливреясын еске салатын түске боялды. Lanzante тағы сондай екі суперкар шығарады, оның біреуін британиялық фирманың Формула-1-дегі жеңісіне арнайды.