Toyota Қазақстанда GR Sport түрленіміндегі Land Cruiser 300-дің бағасы қанша болатынын мәлімдеді. Жаңа өнім кем дегенде 49 410 000 теңге тұрады. Бұл дистрибьютор ұсынған баға, дилерлік орталықтың үстеме ақысы қосылмаған. Қазір жаңа көлік тапшы екенін ескерсек, соңғы баға бұдан едәуір жоғары болуы мүмкін.
Land Cruiser 300 GR Sport басқа бампер, әдеттегі логотиптің орнында Toyota жазуы бар радиатор торы, есіктегі фирмалық тақтайша және дизайны өзгеше дөңгелек дискілерімен ерекшеленеді.
Интерьерде үлкен өзгеріс жоқ. Орындық пен рөлде GR логотипі бейнеленген, бұл белгі кілтте де болады. Ал мультимедиа кешені үшін арнайы экран дайындалған.
GR Sport модельдің мерейтойлық «70th Anniversary» нұсқасы секілді жабдықталған. Онда да e-KDSS жүйесі және барлық дифференциалды бұғаттау мүмкіндігі бар.
Капот астына 415 ат күші мен 650 Нм момент беретін 3.5 литрлік V6 қойылған. Агрегат 10 сатылы автоматпен жұмыс істейді.
Айта кетейік, GR Sport нұсқасының Қазақстанға келуімен қатар, елдегі бағалар да өзгерді. Енді Land Cruiser 300 топтамасында 4 литрлік атмосфералы мотор қойылған машиналар жоқ, әрі модельдің базалық нұсқасы «Престиж» болады. Бұрын 41 150 000 теңгеге сатылса, қазіргі құны — 42 380 000. Мерейтойлық «Престиж» енді 45 270 000 теңгеге сатылады (бұрын 43 950 000 болған). Ал үздік «Премиум 70th Anniversary» 49 500 000-нан 50 990 000 теңгеге қымбаттады.
Комментариев: 0