Lada Vesta автосалонға 2023 жылы оралады

Екатеринбургтегі «Иннопром» көрмесі кезінде ресейлік журналистер АВТОВАЗ басшысы Максим Соколовпен сөйлесті. Олар топ-менеджерден Lada Vesta-ға қатысты жоспарын сұрады.

Соколов «Веста» 2023 жылдың басында Ижевскідегі зауыттың конвейеріне қайта тұратынын айтты. Қазір компания мамандары күн-түн демей санкцияға ұшыраған компоненттер мәселесін шешуге тырысып жатыр. АВТОВАЗ президенті модельдің өндірісі нақты қашан басталатынын қыркүйектің аяғында айтуға уәде берді.

Қазір Ижевскідегі зауытта жұмыс тоқтап тұр. Қызметкерлердің бір тобы «Калашников» концерніне қарайтын ИМЗ-де жұмыс істеп жүр. Ал Тольяттидегі негізгі зауыт тек Lada Granta шығарады, бірақ осы айда ол қатарға Niva қосылуы мүмкін.