Өзінің алғашқы (мүмкін соңғы да болар) миллион шақырымын 2012 жылғы универсал шанағындағы ақ Priora небәрі үш жылда жүріп өткен. Көлік иесі темір тұлпарымен күнде Ясный қаласынан Орск арқылы Орынборға сапар шегіпті. Бір бағыттағы қозғалыстың өзі 400 километрді құраған, — деп жазады «Лада.Онлайн».
«Миллионды» еңсерген көліктің иесі 80 мың км жүрген соң газ баллон орнатып, әр 50 мың км сайын газды құрылғыны техникалық тексерістен өткізіп отырған. Ол мотор қауіпсіздігін де ұмыт қалдырмай, бүріккіштерін үнемі тазартады екен.
Қозғалтқыш осы уақыт аралығында екі рет жөндеуден өтті. Көлік иесінің айтуынша, әр жөндеу барысында оған ВАЗ-2110-ға тиесілі поршендер жинағы орнатылған. Беріліс қорабы тек бір-ақ рет ілінісін ауыстырыпты. Мұнда электронды газ педалі мен стартер (екі рет) ғана сынған.
Жүргізуші мотор майын (әр 12-14 мың км сайын), қораптағы майды (әр 100 мың км сайын) және тежеуіш сұйықтығын (250 мың км-де бір рет) ауыстыруды да естен шығармаған. Тежеуіш дискілерінің шыдамы 30-80 мың, ал аспа тіреулерінің ғұмыры 140 мың шақырымға жетіпті.
Жалпы «Приора» иесінің темір тұлпарына көңілі толады, десе де шетелдік көлік алуға кеңес берді.
Комментариев: 0