Lada-ның салоны былғарымен қапталды

АВТОВАЗ өз тарихында алғаш рет Lada автомобильдерін конвейерде былғарымен қаптайды. Бұл ерекше опцияны Aura лимузиніне емес, жол талғамайтын Niva Travel-ге қолданыпты. Компания интерьері жаңа үш «Ниваны» таныстырды.

Niva Travel-дің салонына ресейлік былғары пайдаланған. Зауыт мамандары хром қосып илеу оны ұзақ тозбайтын әрі жуғыш құралдар мен технологиялық сұйықтықтарға төзімді етеді дейді. АВТОВАЗ мәлімдемесіне сүйенсек, былғарыдан жасалған салон автомобильді қымбат көрсетеді.

Тесікті ендірмелермен әрленген шынтақ тіреуіш, рөл және орындықтар да былғарымен қапталады. Алдыңғы креслоның арқасында модель атауы жазылған өрнек болады.

Жаңа опция арзан емес. Бренд Comfort, Comfort Off-Road және Luxe комплектациялы Niva Travel-дің салонын былғарымен қаптап, мультимедиалық жүйе орнатады. Ең арзан автомобильдің құны — 1 489 500 рубль (7.5 млн теңге). Ресми ақпаратқа сүйенсек, осындай комплектациядағы, бірақ салоны матамен қапталған және опция түріндегі мультимедиа пакеті бар көліктің бағасы 1 265 900 рубль (6.4 млн теңге) екен.

Медиажүйе және былғары салоннан бөлек мұндай Niva Travel жылитын креслолармен, желдеткіш, алдыңғы көрініс камерасы, 15 дюймдік дискілермен жабдықталған. Жол талғамайтын нұсқаға қорғаныс бастырығы, шноркель, тұманға қарсы жүйе және балшықпен жүретін шинасы бар қара дөңгелек дискілер орнатқан. Қымбат автомобиль алдыңғы әйнекті жылыту жүйесімен және 7 дюймдік дисплеймен ерекшеленеді. Оның есік тұтқаларын шанақпен бірдей қылып бояп, дөңгелек дискілерін 16 дюймге дейін ұлғайтады.