Autobild.es сайтының хабарлауынша, сәуірдің ортасында Lada және Dacia брендтерінің дизайнына жауапты қызметке тағайындалған Алехандро Месонеро-Романос жаңа жұмыс тапты. Испан басылымының ақпаратына сенсек, былтыр күзде Volkswagen концернінен Renault Group-қа ауысқан маман енді Alfa Romeo-ның дизайн бөлімін басқарады. Alfa Romeo бір кездері Fiat концернінің құрамында болған, ал қазір Stellantis-пен еншілес компания.
Маманның бұл шешіміне ақша себеп болды ма, әлде өзінің жеке қалауы ма белгісіз. Бірақ бір жағынан бұл түсінікті де секілді. Кім болса да спорттық «Альфа Ромео» мен бюджеттік «ладаның» арасынан алғашқысын таңдайтыны анық.
Білікті маманның қызметтен кетуі Renault Group басшысы Лука де Мео үшін күтпеген жағдай болды. Ол босаған орынға жаңа қызметкер іздеп жатыр. Dacia-Lada дизайн бөліміне уақытша франциялық Дэвид Дюран жетекшілік етеді.
Сонымен қатар 2021 жылы 1 маусымнан бастап АВТОВАЗ-ды тағы да Николас Море басқаратыны белгілі болды. Француз маманы бұған дейін 2016-2018 жылдары ресейлік компанияның басшысы болған.
Комментариев: 0