Lada көліктері қымбаттады

Қарашаның басында АВТОВАЗ барлық модельдің бағасын жаңартты. Кей машина бағасы бірден 125 мың рубль өсті. Ең үздік Lada Granta-ның құны миллионға 100 рубль ғана жетпей тұр. Бірақ базалық нұсқадағы «Гранта» мен «Веста» қымбаттаған жоқ.

Ресейде ең арзан Lada Granta-ны 699 900 рубльге алуға болады (бірақ тапсырысты бірнеше ай күтуге тура келеді). Өзге комплектациялары 64 мың рубль қымбаттады. Седанның ең үздік нұсқасы үшін зауытта 999 900 рубль сұрайды, ал Granta Cross универсалы 1 043 900 рубль, Granta Drive Active 1 183 900 рубль тұрады.

Lada Vesta жайлы да осыны айтуға болады. 90 ат күшіне ие мотормен жүретін базалық нұсқасының бағасы өзгерген жоқ — 1 239 900 рубль. Өзге «Весталар» 83–92 мың рубль қымбаттады. Niva Travel-дің үш түрленімінің бағасы 106 мың рубль өсті (қазір 1 198 900–1 337 900 рубль), ал салоны былғарымен қапталған нұсқаның бағасы әлі жарияланған жоқ. Niva Legend комплектациясына байланысты (Classic-тен басқа) 85–125 мың рубль қымбаттады (қазір 829 900–1 068 900 рубль).

АВТОВАЗ баға не үшін өскенін түсіндірген жоқ. Бұған Ресей валютасы бағамының ауытқуы және өндірістегі қиындық әсер еткен шығар. Оның үстіне логистикаға қатысты проблема туындады деген ақпарат бар, тасымал бағасы өсіп, автотасушы тапшы болып жатқан көрінеді. Мысалы, УАЗ автомобильді дилерлік орталыққа жеткізу үшін 50 мың рубль қосымша ақы енгізіп, өз шығынын тұтынушылар мойнына іліп қойды.

АВТОВАЗ қазанда көлік сатудан рекорд жаңартқанын хабарлады: бір айда 41 мыңға жуық автомобиль өтіпті, бұл Lada-ның кейінгі он жылдағы ең үздік көрсеткіші. Lada Granta тарихтағы ең жақсы нәтижеге қол жеткізді, ал Niva Legend 2014 жылдан бергі үздік көрсеткішін тіркеді.