Lada Африкада шығады

АВТОВАЗ Эфиопия еліндегі фирмалардың бірімен Lada көліктерін шығару жайлы келісімшарт жасады. Бұл туралы аталған елдің Ресейдегі елшісі Чам Угала Уриат ТАСС агенттігіне берген сұхбатында айтты.

Дипломат Эфиопияда шыққан «лада» Судан, Оңтүстік Судан, Кения және Сомали сияқты көрші елдерде сатылатынын айтты. Өндіріс нақты қашан басталатыны белгісіз, бірақ елшінің айтуынша көп кешікпейді.

АВТОВАЗ баспасөз қызметі бұл ақпарат жайлы пікір білдірген жоқ. Африкада Granta мен Niva Legend шығуы мүмкін.

Lada Шығыс Африка елдеріне бұрыннан таныс, социализм құру жолына түскен Эфиопияға ВАЗ-2101 моделін экспорттау 1970 жылдардың аяғында басталған. Автобөлшек тапшы болса да ел астанасы Аддис-Абебада «копейка», «бестік» және өзге де ескі машиналар қазірге дейін такси қызметін атқарып жүр.