Tengrinews.kz хабарлағандай, атың шықпаса жер өртенің керін келтіріп, Әл-Фараби даңғылының бойымен қарама-қарсы бағытта жүйткіген, ол аздай, тас жолда Land Cruiser Prado көлігіне тіркелген шанамен жүрген есерсоқты алматылық полиция тез-ақ тауыпты.
Марапат өз “қаһарманын” тауып, 20 жасар жүргізушіге қатысты бірден бес әкімшілік хаттама толтырылған, олардың біріне сәйкес, жігіт жүргізуші куәлігінен алты айға айырылады екен. Ал қалғандары бойынша ол 5-тен 15-ке дейінгі АЕК көлемінде айыппұл арқалайды. Және ең бастысы, тәртіп сақшылары жас жігітті камера алдында бүкіл қазақстандықтардан кешірім сұрауға мәжбүр етіпті.
Дегенмен, бейнекөрініске зер салса, кешірім сұраушының өз күлкісін әрең-әрең тыйып тұрғанын аңғару қиын емес. Шынайылықтың иісі де шықпайды бұл жерден, оның үстіне актерлік шеберліктен де ада көрінеді. Дәл осы сәтте Станиславскийді шақыру керек сияқты.
Видео: Tengrinews.kz
Алайда сол күні-ақ, кешқұрым ол келесі бейнеүндеуін жариялады:
“Мені ашық ауыз екен, ісіне өкінді деп ойлап қалған жігіттер. Сендер видеоға жақсылап назар аударыңдаршы. Мен онда күлкімді әзер тыйып тұрмын. Видеоға төрт рет түсірді, өйткені мен алғашқы үшеуінде күлкімді тоқтата алмадым”, — дейді 20 жасар жігіт.
Ақиқатын айтсақ, жол ережесін бірнеше рет, оның үстіне өрескел (жолдың қарсы бағытына шығу) бұзған жүргізушінің ең аз уақытқа — 6 айға ғана жүргізуші куәлігінен айырылғаны тым түсініксіз жәйт. Жас ерекшелігін ескерді ме? Бірақ ол бұрын да жол ережесін бұзбап па еді! Ереже бұзушы істеген ісіне өкініш білдірді ме? Алайда қалай өкінгенін біз көрдік қой! Тәртіп сақшылары жазып алған алғашқы бейнероликтен оның кешірім сұраған кейіп танытып, күлкісін әрең тыйып тұрғанын аңғару қиын емес. Ал сонда, алты айдан кейін біздің жолдарға адамдар мен заңға түкіргені бар, хайп үшін өзгелердің өмірі мен денсаулығына қауіп төндіруден еш тайынбайтын жаңа Үсеновтің қайта шығатын болғаны ма? Мүмкін оны бірден ең жоғарғы мерзім — 10 жылға жүргізуші куәлігінен айыру керек пе еді? Айтпақшы, жүргізуші куәлігінен қағылған күннің өзінде, әлгінің рөлге қайта отырмасына кім кепіл?
Комментариев: 0