2025 жылдың сәуірінде тіркелмеген мопедті жүргізуге тыйым салынады. Бұған дейін және қазір мопедистер жаяу жүргінші саналып, мысалы, мас күйінде мопед жүргізгені үшін қоғамдық жерде мас күйде жүргендей жазаланатын. Келер жылы көктемде бәрі күрт өзгереді.
Куәліксіз және нөмірсіз жүру
Барлық мопед міндетті түрде мемлекеттік тіркеуден өтеді. Полицейлер бұл қалай жүзеге асатынын әлі нақтыламады. Ішкі істер министрлігі тіркеу процесін барынша жеңілдетуге уәде берді, олар техниканың қылмысқа қатысы бар-жоғын, VIN нөмірін тексеріп, жоқ болса, оны рамаға басып, содан кейін мемлекеттік нөмір мен техпаспорт береді. Скутерге мотоцикл нөмірі беріледі, қанша уақыт өтсе де, мопедке арналған жеке стандарт әзірленген жоқ.
Kolesa.kz редакциясына Әкімшілік полиция комитеті хабарлағандай, скутерді заңдастыру 2025 жылдың сәуірінде басталады. Оған дейін ІІМ-нің мопед тіркеуге заңды негіздері болмайды. Осылайша, мопед иелерінің алты ай уақыты бар, олар осы уақыт ішінде оқып, жүргізуші куәлігін алып, сондай-ақ тіркеуге қажет құжаттарды ретке келтіруі қажет, мысалы, сатып алу-сату келісімшарты және т.б.
Куәліксіз мопед жүргізгені үшін Әкімшілік кодекстің 612-бабына сәйкес 5 АЕК (2025 жылы 19 660 теңге) айыппұл салынады.
Тіркелмеген немесе мемлекеттік нөмірсіз мопед жүргізгені үшін айыппұл — 10 АЕК (39 320 теңге).
Жалған немесе жасанды нөмір орнату — 15 АЕК (58 980 теңге).
Көлік жүргізу құқығынан айырылған жүргізушіге мопед басқарғаны үшін 50 АЕК (196 600 теңге) айыппұл салынады немесе 10 тәулікке әкімшілік қамауға алынады.
Көлік жүргізу құқығынан айырылған немесе куәлігі жоқ адамға мопедті басқаруға бергені үшін айыппұл — 50 АЕК.
Мопед техникалық байқаудан өту керек пе?
Тіркеуге қойылған және шыққанына 7 жылдан асқан мопед жыл сайын техникалық байқаудан өтуге міндетті болады. Оларға қойылатыны талаптар әзірге белгісіз. Қазір техрегламент елге кіретін немесе өндірілетін скутердің параметрін ғана белгілейді. Заңнамада қолданыстағы мопедке қатысты ақпарат жоқ. Бірақ бұл мәселені шешу үшін Көлік министрлігінде алты ай уақыт бар.
2025 жылдың көктемінен бастап техбайқаудан өтпей мопед жүргізгені үшін 5 АЕК (19 660 теңге) айыппұл салынады.
Шинасы желініп кеткен, газ шығару жүйесі өзгерген, фара орнына жарқылдауық орнатылған және тағы басқа ақауы бар скутерді басқарғаны үшін айыппұл — 5 АЕК.
Тежеуіші, рөлі ақаулы немесе рұқсатсыз қайта жабдықталған мопедті басқару — 15 АЕК (58 980 теңге).
Мопед зауыттан қолдан жасалған желқағар/пленка және жаңбыр мен қардан қорғайтын шатырмен шықпайды, сондықтан бұл мопед жүргізушісін тоқтатып, скутерді айыптұрағына жіберуге негіз бола алады.
Басқа да жол ережесін бұзғаны үшін жазалар
Шлемсіз жүру — 5 АЕК (19 660 теңге).
Мас күйде мопед жүргізу — 15 тәулік әкімшілік қамауға алу және 7 жылға жүргізуші куәлігінен айыру.
Мүліктің бүлінуіне және жәбірленушінің денсаулығына жеңіл зиян келтірген жол апатына себеп болса, 20 АЕК (78 640 теңге) айыппұл төлейді немесе 6 ай көлік жүргізу құқығынан айырылады.
Жаяу жүргінші жолымен, жолдың жиегінде немесе тротуарда жүру — 15 АЕК (58 980 теңге).
Қарсы жолаққа шығу — 6 айға жүргізуші куәлігінен айыру.
Қосарлы бүтін сызықты басып өткені үшін жүргізу құқығынан айырылады.
Белгілер мен таңбаларды елемеу — 3 АЕК (11 796 теңге).
Бағдаршамның қызыл түсіне өту — 10 АЕК (39 320 теңге).
Мопед жүргізушісі жол ережесін бұзып, қауіпті жағдай тудырса, яғни басқа жол қозғалысына қатысушылар жылдамдығын төмендетсе немесе кенеттен бағытын өзгертсе, 10 АЕК (39 320 теңге) айыппұл салынады.
Жол-көлік оқиғасы болған жерден кетіп қалғаны үшін 50 АЕК (196 600 теңге) немесе 1 жылға жүргізуші куәлігінен айырылады.
Шектен тыс түтін шығаратын және шу деңгейі жоғары мопед жүргізу — 2 АЕК (7 864 теңге).
Қозғалыс кезінде телефонмен сөйлесу — 5 АЕК.
Жылдамдықты 10-20 км/сағ-қа асыру — 5 АЕК, ал 20-40 км/сағ-қа асыру — 10 АЕК.
Мопедистер басқа да жол ережесін бұзғаны үшін айыппұл арқалайды.
Мопед жүргізушілері тағы қандай төлем жасайды
2025 жылдың сәуірінен бастап, скутер иесі өз техникасын сақтандыруға тиіс. Сақтандыру полисінің құны басқа мотокөлік сияқты есептелетін болады. Жүргізушінің жасы, тәжірибесі, апатсыз жүргізу мерзімі және т.б. ескеріледі.
Мопедке салық төлеу міндеттеледі. Депутаттар қарастырып жатқан Салық кодексіне түзету енгізу жобасында скутер туралы ештеңе айтылмаған деп хабарлады Kolesa.kz редакциясына Ұлттық экономика министрлігі. Алайда жұмыс барысында мопед құжатқа қосылуы мүмкін. Бұл мәселе де әзірге белгісіз.
Комментариев: 0