Криптовалюта дағдарысы дендеген шақта АҚШ-та ұсталған люкс автомобильдер жаппай сатыла бастады. Сарапшылар криптовалюта иелері тығырықтан шығу үшін беделінің көрсеткіші саналатын мүліктерін сатуға мәжбүр дейді, өйткені бұрынғыдай құлаш керуге жағдайы келмейді.
Криптовалюта ірі биржалардың бірі FTX банкрот болған соң арзандай бастады. Салдарынан онлайн алаңдарда аса сәнді машинасын нарықтағы құнынан төмен саудалайтындар берген хабарландыру көбейді.
Мысалы, АҚШ-та G-класты Mercedes-Benz 300 мың доллар тұратын, қазір оны қолдан 200 мыңға алуға болады. Бір ғана AutoTrader алаңында G-класс ұсынғандар саны 1600-ге жеткен. Одан бөлек Lamborghini Urus пен McLaren суперкарлары арзандады.
Талдаушылар соңғы үш жылда саудаға түскен көліктер арасында құны 100 мың доллардан жоғары автомобиль саны төрт есе артқанын айтады. Бұл жағдай люкс класты машина алуды арман еткенмен, қолы жетпей жүрген жандарға жақсы мүмкіндік беретін сияқты. Бірақ ұзаққа созылар ма екен?
Комментариев: 0