Француз комедияларының бірінде тұрғынды кепілге алған қылмыскер ақша мен көлік талап етеді, Citroën сұраған ол моделін де ұмытпай, қайдағы бір BX емес, XM мінуді жөн көреді.
Оның талабы негізсіз емес. Қатар шығарылған екі көліктің арасы жер мен көктей болатын. BX ескі әрі сұрықсыздау көрінсе, футуристік XM соңына дейін өңін бермеді. Қос машина да 90 жылдары Алматыға аз-аздан жеткізілді.
CX-тің ізбасары саналатын Citroën XM (суретте екеуі бірге тұр) сына тәрізді пішінімен, өзгеше әйнектелуімен таңғалдыратын, әрі өзімен бір платформаны бөліскен Peugeot 605 седанынан мүлде өзгеше көрінді. Флагманға жүрістің бірқалыпты болуы мен жол саңылауының көлемін реттеуге мүмкіндік беретін фирмалық Hydractive аспасы орнатылды. Шын мәнінде бұл көліктің ең осал жері болатын, себебі сығу дәрежесін қадағалайтын бос сфералы жоғары қысым магистраліне рөлді күшейткіш пен тежеуіш жүйесінің гидроаспалары да қосылды.
Қозғалтқыштар топтамасында бензинді, дизельді агрегаттар, карбюраторлы, инжекторлы турбо болды. Олар механика немесе автомат қораппен жұптасатын. Ең төзімдісі турбодизельді көліктер мен механика қорап орнатылған нұсқалар еді.
90 жылдары таңсық көрінген климат-бақылау, круиз-бақылау функциясы бар ауа баптағыш пен электр реттегіштерден бөлек, XM иммобилайзер пин-кодын теруге арналған цифрлы пернетақта, инфрақызыл арнаны басқаратын орталық құлып салпыншағы сынды дүниелермен жабдықталды.Рестайлингке дейінгі нұсқаларында рөл ортасына аудиожүйені басқаратын жүйе орнатылды.
Еуропада «Жыл автокөлігі» атанған Citroën XM автомобиль отаны саналатын Германия жұртының да назарына ілігіп, ең танымал шетелдік көлік болды. Алайда екінші нарықта сұраныс жоғары болмады, өйткені машинаға қызмет көрсету құны тым жоғары еді, бөлшектері де өте қымбат сатылды. Дегенмен 2001 жылға дейін модельдің үш жүз мыңнан аса данасы жарық көрді.
Көп адамға беймәлім дерек — Қытайдағы Dongfeng-PSA бөлімшесінде ірі торапты жинақтардан құрастырылған элиталы француз машиналары Fengshen-Xietuolong XM деп аталды.
Күтіп айдауды және сервиске жиі баруды қажет ететін Citroën XM біздің үнемшіл жүргізушілердің қалтасына салмақ түсірді. Тарамдалған гидропневматиканың жұмысын тиісті деңгейде сақтауға көп адамның ақшасы да, құлқы да болмады. Сондықтан «француз» әбден қауқары қалмай, жарамсыз күйге түскенше жолда жүретін.
Комментариев: 0